Harleian Manuscript 279

Arbolettys.
Take Milke, Boter an Chese, & boyle in fere; þen take eyroun, & cast þer-to; þan take Percely & Sawge & hacke it smal, & take pouder Gyngere & Galyngale, and caste it þer-to, and þan serue it forth.

Spyneye.
Take þe Flowþerys of Hawthorun; boyle hem & presse hem, bray hem smal, temper hem vppe wyth Almaunde Milke, & lye it with Abyndoun & Gratyd brede & flowre of Rys; take Sugre y-now & put þer-to, or Hony in defawte, & colowre it wyth þe same þat þe flowrys ben, & serue forth.

Brasele.
Take Dace, Troutys, & Roche, an roste hem on a gredelle; þan seþe in Wyne, & caste Veryous þer-to, powder of Gyngere, & Galyngale, & dresse it yn.

Crem de Coloure.
Take an make þicke Milke of Almaundys, & do it in a potte, & sethe it ouer þe fyre; þan take a fayre Canvas, an put it þer-on, & late renne out þe Water; þen take þe halfyndele, & put it in a pot of erþe; þen take the oþer halfyndele, & parte it in to, & make þe half ȝelow, & do þer-yn Wyn, Sugre, Clowes, Maces, powder of Canelle; take & grynd a lytel in a morter; þan temper it vppe wyth almaunde mylke, & do euery of hem in a potte, an loke þat it be y-like chargeaunt, & sette it ouer þe fyre, an boyle it a lytyl, an serue forth.

Colouryd Sew with-owt fyre.
Take fowre pounde of Almaundys, & ley in Water ouer eue, an blanche hem, and on þe morwe grynde hem ryth wyl, an draw þer-of a þicke mylke; þan take Rys, and wasshem clene, an grynd hem wyl, & draw hem vppe wyth þe Mylke þorw a straynoure, an do it on a bolle, & parte it in þe vesselle, an do in al whyte Sugre, an euery vesselle Clowes, Maces, Quybibes, & pouder Canelle; An lete þat on party ben whyte, þat oþer ȝelow, & þat oþer grene with Percely; And ley of euery a leche in a dysshe, an loke þat Mylke be temperyd wyth wyne, an þatoþer with Rede wyn.

Apple Muse.
Take Appelys an sethe hem, an Serge hem þorwe a Sefe in-to a potte; þanne take Almaunde Mylke & Hony, an caste þer-to, an gratid Brede, Safroun, Saunderys, & Salt a lytil, & caste all in þe potte & lete hem sethe; & loke þat þou stere it wyl, & serue it forth.

Salomene.
Take gode Wyne, an gode pouder, & Brede y-ground, an sugre, an boyle it y-fere; þan take Trowtys, Rochys, Perchys, oþer Carpys, oþer alle þese y-fere, an make hem clene, & aftere roste hem on a Grydelle; þan hewe hem in gobettys: whan þey ben y-sothe, fry hem in oyle a lytil, þen caste in þe brwet; and whan þou dressist it, take Maces, Clowes, Quybibes, Gelofrys; an cast a-boue, & serue forth.

Blaundysorye.
Take Almaunde Mylke, an flowre of Rys, and brawn of Capounys or of hennys, & pouder Gyngere, & boyle it y-fere, & make it chargeaunt; an whan þou dressest yn, nym Maces, Quybibes, & caste a-boue, & serue forth.

Blamang.
Take Rys, an lese hem clene, & wasshe hem clene in flake Water, & þan sethe hem in Watere, & aftyrward in Almaunde Mylke, & do þer-to Brawn of þe Capoun aftyrward in-to a-noþer almaunde Mylke, an tese it smal sumdele with a pyn, an euer as it wolt caste þer-to, stere it wel; nym Sugre and caste þer-to, þen make it chargeaunt; þen take blawn-chyd Almaundys, an frye hem, an sette hem a-boue, whan þou seruyst ynne; & ȝif þou wolt, þou myȝte departe hem with a Cawdelle Ferry y-wreten an þan serue forth.

Vyaund de cyprys bastarde.
Take gode wyne, & Sugre next Aftyrward, & caste to-gedere; þenne take whyte Gyngere, and Galyngale, & Canel fayre y-mynced; þen take Iuse of Percile & Flowre of Rys, & Brawn of Capoun & of Chykonnys I-grounde, & caste þer-to; An coloure it wyth Safroun & Saunderys, an a-ly it with ȝolkys of Eyroun, & make it chargeaunt; an whan þou dressest it yn, take Maces, Clowes, Quybibes, and straw a-boue, & serue forth.

Vyaund de ciprys Ryalle.
Take þe to del ȝolkys of eyron, þe þridde dele Hony; take Clowes & kutte hem; take Roysonys, tak brawn of Capoun, & hewe it smal; caste al in a potte, & lat boyle & stere it wyl; take wyne an boyle hem, & make a Syryppe; take of þe potte al a-bowte, þer as it hangyth, & late it boyle wyl tille it be as chargeaunt as it may; take þin þombe & pylt þer-on, & ȝif it cleuey, let it boyle, & ȝif it nowt, sette it owt a-non in a clen bolle, an wete þin bolle in þe Syrippe, and caste þin mete þer-on; & whan þow dressist þi mete, leche it & caste þin Syryppe a-bouyn vppe-on, & serue forth.

Gaylede.
Take Almaunde Mylke & Flowre of Rys, & do þer-to Sugre or Hony, & Powder Gyngere & Galyngale; þen take figys, an kerue hem a-to, or Roysonys y-hole, or hard Wastel y-dicyd and coloure it with Saunderys, & sethe it & dresse hem yn.

Rys.
Take a porcyoun of Rys, & pyke hem clene, & sethe hem welle, & late hem kele; þen take gode Mylke of Almaundys & do þer-to, & seþe & stere hem wyl; & do þer-to Sugre an hony, & serue forth.

Maumenye ryalle.
Take Vernage, oþer strong Wyne of þe beste þat a man may fynde, an putte it on a potte, & caste þer-to a gode quantyte of pouder Canelle, & sette it on þe fyre, an ȝif it an hete; & þanne wrynge it soft þorw a straynoure, þat þe draf go nowt owte, & put on a fayre potte, & pyke fayre newe pynys, & wasshe hem clene in Wyn, & caste a gode quantyte þer-to, & take whyte Sugre þer-to, as moche as þe lycoure is, & caste þer-to; & draw a few Sawnderys wyth strong wyne þorwe a straynoure, an caste þer-to, & put alle In one potte, & caste þer-to Clowys, a gode quantyte, & sette it on þe fyre, & ȝif it a boyle; þen take Almaundys, & draw hem with mythty Wyne; & at þe firste boyle ly it vppe with Ale, & ȝif it a boyle, & sette it on þe fyre, and caste þer-to tesyd brawn, (of defaute of Pertriche or Capoun,) a gode quantyte of tryid Gyngere perase, & sesyn it vppe with pouder Gyngere, & Salt & Safroun; & ȝif it is to stondyng, a-ly it with Vernage or swete Wyne, & dresse it Flat with þe backe of a Sawcere in þe Vernage or myȝthty Wyne, & loke þat þou haue Sugre y-nowe, & serue forth hote.

Mammenye bastarde.
Take a potelle of Clarifiyd Hony, & a pounde of Pynys, & a pounde of Roysouns Coraunce, & a pound of Saunderys, & pouder canelle, & .ij. galouns of Wyne or Ale, & a pound of Pepir, & caste alle on a potte, & skym yt; þan take .iij. pounde of Amyndons, & a galon of Wyne, & a gode galon of Venegre, & let stepe vp to-gederys, & draw þorw a straynoure; an whan þe potte boylith, caste þe lycoure þer-to, an lat it be alle stondyng; þan take pouder Gyngere, Salt & Safron, an sesyn it vppe, an serue alle flat on a dysshe, aƚƚ hote, an caste pouder Gyngere þer-on, an serue forth.

Elys in Gauncelye.
Take Elys, an fle hem, & sethe hem in Water, an caste a lytil Salt þer-to; þan take Brede y-Skaldyd, an grynd it, an temper it with þe brothe an with Ale; þan take Pepir, Gyngere, an Safroune, an grynd alle y-fere; þan neme Oynonys, an Percely, an boyle it in a possenet wel, þen caste alle to-gederys, an sethe y-fere & serue forth.

Hennys in Gauncelye.
Take Hennys, an roste hem; take Mylke an Garleke, an grynd it, an do it in a panne, an hewe þin hennys þer-on with ȝolkys of eyron, an coloure it with Safroun an Mylke, an serue forth.

Vyolette.
Nym Almaunde Mylke, an flowre of Rys, and pouder Gyngere, Galyngale, Pepir, Datis, Fygys, & Rasonys y-corven, an coloure it with Safroun, an boyle it & make it chargeaunt; an whan þou dressyste, take þe flowres, an hew hem, an styre it þer-with; nyme þe braunchys with þe flowres, an sette a-boue and serue it Forth.

Oystrys in bruette.
Take an schene Oystrys, an kepe þe water þat cometh of hem, an strayne it, an put it in a potte, & Ale þer-to, an a lytil brede þer-to; put Gyngere, Canel, Pouder of Pepir þer-to, Safroun an Salt; an whan it is y-now al-moste, putte on þin Oystrys: loke þat þey ben wyl y-wasshe for þe schullys: & þan serue forth.

Walkys in bruette.
Take Walkys an sethe in Ale, þen pyke hem clene; þan wasshem in Water an Salt be hem-self, & fyrst wyth Ale & Salt, an do so whele þey ben slepyr; þen putte hem in Vynegre, an ley Perceli a-boue, an serue ynne.

Tenche in bruette.
Take þe Tenche, an sethe hem & roste hem, an grynde Pepir an Safroun, Bred and Ale, & tempere wyth þe brothe, an boyle it; þen take þe Tenche y-rostyd, an ley hym on a chargeoure; þan ley on þe sewe a-boue.

Tenche in cyueye.
Take a tenche, an skalde hym, roste hym, grynde Pepir an Safroun, Brede an Ale, & melle it to-gederys; take Oynonys, hakke hem, an frye hem in Oyle, & do hem þer-to, and messe hem forth.

Tenche in Sawce.
Take a tenche whan he is y-sothe, and ley him on a dysshe; take Percely & Oynonys, & mynce hem to-gederys; take pouder Pepir, & Canelle, & straw þer-on; take Vynegre, an caste Safroun þer-on, an coloure it, an serue it forth þanne alle colde.

Chykonys in bruette.
Take an Sethe Chykonys, & smyte hem to gobettys; þan take Pepir, Gyngere, an Brede y-grounde, & temper it vppe wyth þe self brothe, an with Ale; an coloure it with Safroun, an sethe an serue forth.

Blamanger of Fyshe.
Take Rys, an sethe hem tylle they brekyn, & late hem kele; þan caste þer-to mylke of Almaundys; nym Perche or Lopstere, & do þer-to, & melle it; þan nym Sugre with pouder Gyngere, & caste þer-to, & make it chargeaunt, and þan serue it forth.