Sardeyneȝ.
Take Almaundys, & make a gode Mylke of Flowre of Rys, Safroun, Gyngere; Canelle, Maces, Quybibeȝ; grynd hem smal on a morter, & temper hem vppe with þe Mylke; þan take a fayre vesselle, & a fayre parte of Sugre, & boyle hem wyl, & rynsche þin dysshe alle a-bowte with-ynne with Sugre or oyle, an þan serue forth.
Roseye
Take Almaunde Mylke an flowre of Rys, & Sugre, an Safroun, an boyle hem y-fere; þan take Red Rosys, an grynd fayre in a morter with Almaunde mylke; þan take Loches, an toyle hem with Flowre, an frye hem, & ley hem in dysshys; þan take gode pouder, and do in þe Sewe, & caste þe Sewe a-bouyn þe lochys, & serue forth.
Eyron en poche.
Take Eyroun, breke hem, an sethe hem in hot Water; þan take hem Vppe as hole as þou may; þan take flowre, an melle with Mylke, & caste þer-to Sugre or Hony, & a lytel pouder Gyngere, an boyle alle y-fere, & coloure with Safroun; an ley þin Eyroun in dysshys, & caste þe Sewe a-boue, & caste on pouder y-now. Blawnche pouder ys best.
Muskelys in bruette.
Take þe Muskelys whan þey ben y-sothe, & pyke owt þe Muskele of þe schulle, & pyke a-way ye here: þan take brede, an pepir & Safroun y-grounde, & temper it vp with þe brothe; & ȝif þou wolt, a-lye it with Wyne or with Ale, & serue forth.
Fygeye.
Take Fygys, an sethe hem tylle þey ben neysshe, þan bray hem tylle þey ben smal; þenne take hem vppe an putte hem in a potte, & Ale þer-to; þan take Bred y-gratyd, an Pyneȝ hole, & caste þer-to, & let boyle wyl; & atte þe dressoure, caste on pouder Canel y-now, & serue forth: & ȝif þow wolt colour yt in .iij. maners, þou myȝt, with Saunderys, Safroun, & of hym-self, and ley on pouder y-now, & serue forth.
Bolas.
Take fayre Bolasse, wasshe hem clene, & in Wyne boyle hem þat þey be but skaldyd bywese, & boyle hem alle to pomppe, & draw hem þorw a straynoure, & a-lye hem with flowre of Rys, & make it chargeaunt, & do it to þe fyre, & boyl it; take it of, & do þer-to whyte Sugre, gyngere, Clowys, Maces, Canelle, & stere it wyl to-gederys: þanne take gode perys, & sethe hem wel with þe Stalke, & sette hem to kele, & pare hem clene, and pyke owt þe corys; þan take datis, & wasshe hem clene, & pyke owt þe Stonys, & fylle hem fulle of blaunche poudere: þan take þe Stalke of þe Perys, take þe Bolas, & ley .iij. lechys in a dysshe, & sette þin perys þer-yn.
Lorey de Boolas.
Take Bolas, & seþe hem a lytil, & draw hem þorw a straynoure, & caste hem in a broþe; & do þer-to Brede y-gratyd, & boyle y-fere, & ȝolkys of eyroun y-swengyd, & a-lyid; take Canel, and Galyngale, Skemyd hony, & do þer-to, & sethe wyl, & serue forth.
Rapeye of Fleysshe.
Take lene Porke y-sode & y-grounde smalle, & tempere it vppe with þe self broþe, & do it in a potte, an caste þer-to a lytil honye, & boyle it tyl it be chargeaunt; & a-lye it wyth ȝolkys of Eyroun, & coloure it with Saunderys, & dresse forth, and pouder Marchaunt.
Sore Sengle.
Take Elys or Gurnard, & parte hem half in Wyne, & half in watere, in-to a potte; take Percely and Oynonys & hewe hem smalle; take Clowes or Maces & caste þer-on; take Safroun, & caste þer-to, & sette on þe fyre, & let boyle tylle it be y-now; þen sette it a-doun; take poudere Gyngere, Canelle, Galyngale, & temper it vppe with Wyne, & cast on þe potte & serue forth.
Prymerose.
Take oþer half-pound of Flowre of Rys, .iij. pound of Almaundys, half an vnce of hony & Safroune, & take þe flowre of þe Prymerose, & grynd hem, and temper hem vppe with Mylke of þe Almaundys, & do pouder Gyngere þer-on: boyle it, & plante þin skluce with Rosys, & serue forth.
Gelye de chare.
Take caluys fete, & skalde hem in fayre water, an make hem alle þe whyte. Also take howhys of Vele, & ley hem on water to soke out þe blode; þen take hem vppe, an lay hem on a fayre lynen cloþe, & lat þe water rennyn out of hem; þan Skore a potte, & putte þe Fete & þe Howhys þer-on; þan take Whyte Wyne þat wolle hold coloure, & cast þer-to a porcyon, an non oþer lycoure, þat þe Fleysshe be ouer-wewyd withalle, & sette it on þe fyre, & boyle it, & Skeme it clene; an whan it is tendyr & boylid y-now, take vppe þe Fleyshe in-to a fayre bolle, & saue þe lycoure wyl; & loke þat þow haue fayre sydys of Pyggys, & fayre smal Chykenys wyl & clene skladdyd & drawe, & lat þe leggys an þe fete on, an waysshe hem in fayre water, & caste hem in þe fyrste brothe, an sethe it a-ȝen ouer þe fyre, & skeme it clene; lat a man euermore kepe it, an blow of þe grauy. An in cas þe lycoure wast a-way, caste more of þe same wyne þer-to, & put þin honde þer-on; & ȝif þin hond waxe clammy, it is a syne of godenesse,Page 26 an let not þe Fleyshe be moche sothe, þat it may bere kyttyng; þan take it vppe, & ley it on a fayre cloþe, & sette owt þe lycoure fro þe fyre, & put a few colys vnder-nethe þe vesselle þat þe lycoure is yn; þan take pouder of Pepir, a gode quantyte, & Safron, þat it haue a fayre Laumbere coloure, & a gode quantyte of Vynegre, & loke þat it be sauery of Salt & of Vynegre, fayre of coloure of Safroun, & putte it on fayre lynen cloþe, & sette it vndernethe a fayre pewter dysshe, & lat it renne þorw þe cloþe so ofte tylle it renne clere: kytte fayre Rybbys of þe syde of þe Pygge, & lay ham on a dysshe, an pulle of þe lemys of þe Chykenys, eche fro oþer, & do a-way þe Skynne, & ley sum in a dysshe fayre y-chowchyd, & pore þin gelye þer-on, & lay Almaundys þer-on, an Clowys, & paryd Gyngere, & serue forth.
Gelye de Fysshe.
Take newe Pykys, an draw hem, and smyte hem to pecys, & sethe in þe same lycoure þat þou doste Gelye of Fleysshe; an whan þey ben y-now, take Perchys and Tenchys, & seþe; & Elys, an kutte hem in fayre pecys, and waysshe hem, & putte hem in þe same lycoure, & loke þine lycoure be styf y-now; & ȝif it wolle notte cacche, take Soundys of watteryd Stokkefysshe, or ellys Skynnys, or Plays, an caste þer-to, & sethe ouer þe fyre, & skeme it wyl; & when it ys y-now, let nowt þe Fysshe breke; þenne take þe lycoure fro þe fyre, & do as þou dedyst be þat oþer Gelye, saue, pylle þe Fysshe, & ley þer-off in dysshis, þat is, perche & suche; and Flowre hem, & serue forthe.
Tannye.
Take almaunde Mylke, & Sugre, an powdere Gyngere, & of Galyngale, & of Canelle, and Rede Wyne, & boyle y-fere: & þat is gode tannye.
Sturmye.
Take gode mylke of Almaundys y-drawe with wyne; take porke an hew it Smalle; do it on a Morter, and grynde it ryth smalle; þen caste it in þe same Mylke, & caste it on a potte; take Sawnderys & flowre of Rys; melle hem with þe Mylke, draw hem þorw a straynoure, & caste it in a clene pot, loke þat it be chargeaunt y-now; take Sugre, an putte þer-on, & Hony; do it ouer þe fyre, & let it sethe a gret whyle; sture yt wyl; take Eyroun hard y-soþe, take þe whyte, & hew hem as smalle as þow myȝth, caste hem on þe potte; take Safroune & caste þer-to, with powder Gyngere, Canelle, Galyngale, Clowys, & loke þat þou haue powder y-now; caste it in þe potte, temper it with Vynegre; take Salt & do þer-to, menge hem wylle to-gederys, Make a Siryppe; þe .ij. dele schalle ben wyne, & þe .ij. dele Sugre or hony; boyle it & stere it, & Skeme it clene; þer-on wete þin dyssches, & serue forth.
Bruette saake.
Take Capoun, skalde hem, draw hem, smyte hem to gobettys, Waysshe hem, do hem in a potte; þenne caste owt þe potte, waysshe hem a-ȝen on þe potte, & caste þer-to half wyne half Broþe; take Percely, Isope, Waysshe hem, & hew hem smal, & putte on þe potte þer þe Fleysshe is; caste þer-to Clowys, quybibes, Maces, Datys y-tallyd, hol Safroune; do it ouer þe fyre; take Canelle, Gyngere, tempere þin powajes with wyne; caste in-to þe potte Salt þer-to, hele it, & whan it is y-now, serue it forth.
Tayleȝ.
Take a chargeaunt Mylke of Almaundys, an draw with wyne caste in to þe potte; take Fygys & Roysonys a gode porcyon, to make it chargeaunt, waysshe hem clene, & caste hem on a morter, grynd hem as small as þou myȝt, temper hem vppe with þin Mylke, draw hem þorw a straynoure, also chargeauntly as þou myȝth; caste it in a clene potte, do it to þe fyre; take Datys y-taylid a-long, & do þer-to; take Flowre of Rys, & draw it þorw a straynoure, and caste þer-to, & lat it boyle tylle it be chargeaunt; sette it on þe fyre; take pouder Gyngere & Canelle, Galyngale; temper with Vynegre, & caste þer-to Sugre, or hony; caste þer-to, sesyn it vppe with Salt, & serue forth.
Quynade.
Take Quynces, & pare hem clene, caste hem on a potte, & caste þer-to water of Rosys; do it ouer þe fyre, & hele it faste, & let it boyle a gode whyle tyl þey ben neysshe; & ȝif þey wol not ben neysshe, bray hem in a Morter smal, draw hem þorw a straynoure; take gode Mylke of Almandys, & caste in a potte & boyle it; take whyte Wyne & Vynegre, an caste þer-to þe Mylke, & let it stonde a whyle; take þan a clene canvas, & caste þe mylke vppe-on̛, & with a platere stryke it of þe cloþe, & caste it on þe potte; gedyr vppe þe quynces, & caste to þe creme, & do it ouer þe fyre, & lat boyle; take a porcyon of pouder of Clowys, of Gyngere, of Graynys of Perys, of Euery a porcyon; take Sugre y-now, with Salt, & a party of Safroun, & alle menge to-gederys; & when þou dressyst forth, plante it with foyle of Syluer.
Blaunche de ferry.
Take Almaundys, an draw þer-of an Chargeaunt Mylke; take Caponys & sethe hem; & whan þey ben y-now, take hem vppe, & ley hem on a fayre bord, & strype of þe Skyn, & draw out þe Brawn & hew hem smal; do hem on a Morter, & grynd hem smal; caste on a potte, & fayre whyte Salt, & boyle hem; & whan þey bey boylid, sette it out, & caste on whyte Wyne or Venegre, & make it quayle; take a clene cloþe and lete it be tryid a-brode, & stryke it wyl vnder-nethe alle þe whyle þat þer wol auȝt out þer-of; þan caste Blaunche powder þer-on, or pouder Gyngere y-mellyd with Sugre; stryke it clene, take a newe Erþen potte, oþer a clene bolle, & caste þin mete þer-on, þer plantyng Anys in comfyte.
Sauge.
Take Gyngere, Galyngale, Clowys, & grynde in a morter; þan take an handfulle of Sawge, & do þer-to, grynd wyl to-gederys; take Eyroun, & sethe hem harde, nym þe ȝolkys, grynde hem with þe Sawge & with þe spycis, & temper it vppe with Venegre or eysel, or with Alegere; take þe whyte of þe Eyroun, & sethe hem, & mynce hem smal, & caste þer-to; when it is y-temperyd, take Brawn of hennys or Fyssches, & ley on dysschys, & caste þin mete a-boue.
Murreye.
Take Molberys, & wryng hem þorwe a cloþe; nym Vele, hew it, sethe it, grynd it smal, & caste þer-to; nym gode Spycery, Sugre, & caste þer-to; take Wastylbrede y-gratyd, and ȝolkys of Eyroun, & lye it vppe þer-with, & caste gode pouder a-boue y-now, & þan serue forth.
Vyaunde de cyprys in lente.
Take gode þikke mylke of Almaundys, & do it on a potte; & nyme þe Fleysshe of gode Crabbys, & gode Samoun, & bray it smal, & tempere yt vppe with þe forsayd mylke; boyle it, an lye it with floure of Rys or Amyndoun, an make it chargeaunt; when it ys y-boylid, do þer-to whyte Sugre, a gode quantyte of whyte Vernage Pimeȝ with þe wyne, Pome-garnade. Whan it is y-dressyd, straw a-boue þe grayne of Pome-garnade.
Whyte Mortrewys of Porke.
Take lene Porke, & boyle it; blaunche Almandys, & grynd hem, & temper vppe with þe brothe of þe porke, & lye hem vppe with þe Flowre of Rys, an lete boyle to-gederys, but loke þat þe porke be smal grounde y-now; caste þer-to Myncyd Almaundys y-fryid in freysshe grece; þen sesyn hem vppe alle flatte in a dysshe; þrow þer-to Sugre y-now & Salt; & atte þe dressoure, strawe þer-on pouder Gyngere y-mellyd with Almaundys.
Rapeye.
Take Fygys & Roysonys, & grynd hem in a Mortere, & tempere hem vppe with Almaunde Mylke, & draw hem þorw a cloþe; þen take gode Spycys, & caste þer-to; take Perys, seþe hem & pare hem, & do a-way þe core, & bray hem in a mortere, & caste to þe oþer; take gode Wyne, & Blake Sugre or Hony, & caste þer-to a lytil, & let it boyle in fere; & whan þow dressyst yn, take Maces & Clowes, Quybibys & Graynys, & caste a-boue.
A rede Morreye.
Take Molberys, and wrynge a gode hepe of hem þorw a cloþe; nym Vele, hew it & grynd it smal, & caste þer-to; nym gode Spycery an Sugre, & caste þer- to; take Wastilbrede & grate it, & ȝolkys of Eyroun, & lye it vppe þer-with, & caste gode pouder of Spycery þer-an a-bouen; & þan serue it forth.
Strawberye.
Take Strawberys, & waysshe hem in tyme of ȝere in gode red wyne; þan strayne þorwe a cloþe, & do hem in a potte with gode Almaunde mylke, a-lay it with Amyndoun oþer with þe flowre of Rys, & make it chargeaunt and lat it boyle, and do þer-in Roysonys of coraunce, Safroun, Pepir, Sugre grete plente, pouder Gyngere, Canel, Galyngale; poynte it with Vynegre, & a lytil whyte grece put þer-to; coloure it with Alkenade, & droppe it a-bowte, plante it with þe graynys of Pome-garnad, & þan serue it forth.
Chyryoun.
Take Chyryis, & pike out þe stonys, waysshe hem clene in wyne, þan wryng hem þorw a cloþe, & do it on a potte, & do þer-to whyte grece a quantyte, & a partye of Floure of Rys, & make it chargeaunt; do þer-to hwyte Hony or Sugre, poynte it with Venegre; A-force it with stronge pouder of Canelle & of Galyngale, & a-lye it with a grete porcyoun of ȝolkys of Eyroun̛; coloure it with Safroun or Saunderys; & whan þou seruyste in, plante it with Chyrioun, & serue forth.
Vyolette.
Take Flourys of Vyolet, boyle hem, presse hem, bray hem smal, temper hem vppe with Almaunde mylke, or gode Cowe Mylke, a-lye it with Amyndoun or Flowre of Rys; take Sugre y-now, an putte þer-to, or hony in defaute; coloure it with þe same þat þe flowrys be on y-peyntid a-boue.
Rede Rose.
Take þe same, saue a-lye it with þe ȝolkys of eyroun, & forþer-more as vyolet.
Prymerose.
Ryȝth as vyolette.
Flowrys of hawþorn.
In þe same maner as vyolet.
A potage on a Fysdaye.
Take an sethe an .ij. or .iij. Applys y-parede, & strayne hem þorw a straynoure, & Flowre of Rys þer-with; þan take þat whyte Wyne, & strayne it with-alle; þan loke þat it be nowt y-bounde to moche with þe Floure of Rys, þan ȝif it a-boyle; þen caste þer-to Saunderys & Safroun, & loke it be marbylle; þan take Roysonys of corauns, & caste þer-on, & Almaundys y-schredyd þer-on y-nowe; & mynce Datys Smale, & caste þer-on, & a lytil Hony to make it dowcet, or ellys Sugre; þenne caste þer-to Maces & Clowys, Pepir, Canelle, Gyngere, & oþer spycery y-now; þen take Perys, & sethe hem a lytil; þen reke hem on þe colys tyl þey ben tendyr; þan smale schrede hem rounde; & a lytil or þou serue it in, þrow hem on þe potage, & so serue hem in almost flatte, noȝt Fullyche.
Brewes in Lentyn.
Take a fewe Fygys, & seþe hem & draw hemPage 30 þorw a straynoure with Wyne; þen putte þer-to a lytil Hony; þen toste Brede, & Salte it; & so broune & rennyng as Brwes, serue hem in, & straw pouder Canelle y-now þer-on atte þe dressoure, & serue it forth.
A potage colde.
Take Wyne, & drawe a gode þikke Milke of Almaundys with Wyne, ȝif þou mayste; þen putte yt on a potte, caste þer-to Pouder Canelle & Gyngere & Saffroun; þen lat it boyle, & do it on a cloþe; & ȝif þou wolt, late hym ben in dyuers colourys, þat on whyte with-owte Spyces, & þat oþer ȝelow with Spicerye.