Pygge y-farsyd.
Take raw Eyroun, & draw hem þorw a straynoure; þan grate fayre brede; take Safroun & Salt, & pouder of Pepir, & Swet of a schepe, & melle alle to-gederys in a fayre bolle; þen broche þin Pygge; þen farce hym, & sewe þe hole, & lat hym roste; & þan serue forth.
Poddyng of Capoun necke.
Take Percely, gysour, & þe leuer of þe herte, & perboyle in fayre water; þan choppe hem smal, & put raw ȝolkys of Eyroun .ij. or .iij. þer-to, & choppe for-with. Take Maces & Clowes, & put þer-to, & Safroun, & a lytil pouder Pepir, & Salt; & fille hym vppe & sew hym, & lay him a-long on þe capon Bakke, & prycke hym þer-on, and roste hym, & serue forth.
Capoun or gos farced.
Take Percely, & Swynys grece, or Sewet of a schepe, & parboyle hem to-gederys til þey ben tendyr; þan take harde ȝolkys of Eyroun, & choppe for-with; caste þer-to Pouder Pepir, Gyngere, Canel, Safroun, & Salt, & grapis in tyme of ȝere, & clowys y-nowe; & for defawte of grapis, Oynons, fyrst wil y-boylid, & afterward alle to-choppyd, & so stuffe hym & roste hym, & serue hym forth. And ȝif þe lust, take a litil Porke y-sode, & al to-choppe hit smal a-mong þat oþer; for it wol be þe better, & namely for þe Capoun.
Pokerounce.
Take Hony, & caste it in a potte tyl it wexe chargeaunt y-now; take & skeme it clene. Take Gyngere, Canel, & Galyngale, & caste þer-to; take whyte Brede, & kytte to trenchours, & toste ham; take þin paste whyle it is hot, & sprede it vppe- on þin trenchourys with a spone, & plante it with Pynes, & serue forth.
Sauoge.
Take Pigis fete clene y-pekyd; þan tak Freysshe broþe of Beff, & draw mylke of Almaundys, & þe Piggys þer-in; þen mence Sawge; þan grynd hym smal, & draw owt þe Ius þorw a straynoure; þan take clowys y-now, & do þer-in pouder Gyngere, & Canelle, Galyngale, Vynegre, & Sugre y-now; Salt it þan, & þanne serue forth.
A Kyde a-Forsyde.
Take a pigge, & make hym clene, and Skynne hym, & Fylle it ful of suche mete as þou dost a capoun; þan take þe fleysshe, & vntrusse hym on a spete, in þe maner of a kede, & roste hym; & endore hym with ȝolkys of Eyroun as an kede, & þan serue forth.
Eyroun in lentyn.
Take Eyroun, & blow owt þat ys with-ynne atte oþer ende; þan waysshe þe schulle clene in warme Water; þan take gode mylke of Almaundys, & sette it on þe fyre; þan take a fayre canvas, & pore þe mylke þer-on, & lat renne owt þe water; þen take it owt on þe cloþe, & gader it to-gedere with a platere; þen putte sugre y-now þer-to; þan take þe halvyndele, & colour it with Safroun, a lytil, & do þer-to pouder Canelle; þan take & do of þe whyte in the neþer ende of þe schulle, & in þe myddel þe ȝolk, & fylle it vppe with þe whyte; but noȝt to fulle, for goyng ouer; þan sette it in þe fyre & roste it, & serue forth.
Puddyng of purpaysse.
Take þe Blode of hym, & þe grece of hym self, & Ote-mele, & Salt, & Pepir, & Gyngere, & melle þese to-gederys wel, & þan putte þis in þe Gutte of þe purpays, & þan lat it seþe esyli, & not hard, a good whylys; & þan take hym vppe, & broyle hym a lytil, & þan serue forth.
Raynolleȝ.
Nym sode Porke & chese, & seþe y-fere, & caste þer-to gode pouder Pepir, Canelle, Gyngere, Clowes, Maceȝ, an close þin comade in dow, & frye it in freysshe grece ryȝt wel; an þanne serue it forth.
Froyse in lentynne.
Take Fygis & Roysonys, & grynde hem in a mortere, & draw vppe with kreme of Almaundys; þan take Rys þorw a cloþe; þan take þe Luce, an þe Perche, & þe Schrympe, & seþe hem, & do a-way þe bonys, & þe hedys, & grynde hem in an Mortere, & draw hym vppe with þe creme of þe Almaundys; þen take Rys, & do hem on a potte ouer þe fyre, Whan þey ben clene, with a lytil Watere, late hem seþe til þey ben drye, & þat þey schorge; þan take & hew on a borde, & do þer-to; þen take Sugre, & Safroun a goode quantyte, & gode pouder, & caste þer-to, & boyle it y-fere, & frye it in oyle, & make þer-of a Froyse, & serue forth.
Payn pur-dew.
Take fayre ȝolkys of Eyroun, & trye hem fro þe whyte, & draw hem þorw a straynoure, & take Salt and caste þer-to; þan take fayre brede, & kytte it as troundeȝ rounde; þan take fayre Boter þat is claryfiyd, or ellys fayre Freysshe grece, & putte it on a potte, & make it hote; þan take & wete wyl þin troundeȝ in þe ȝolkys, & putte hem in þe panne, an so frye hem vppe; but ware of cleuyng to the panne; & whan it is fryid, ley hem on a dysshe, & ley Sugre y-nowe þer-on, & þanne serue it forth.
Meselade.
Take Eyroun, þe ȝolkys an þe whyte to-gedere, & draw hem þorw a straynoure; & þan take a litil Botere, & caste in a fayre frying panne; & whan þe boter is hot, take þe drawyn Eyroun, & caste þer-to; þan take a Sawcere, an gadre þe Eyroun to-gedere in þe panne, as it were þe brede of a pewter dysshe; & þan take fayre peceȝ of Brede, þe mountance of a mosselle of Brede, vppe-on þe Eyroun, & turne þan thy brede downward in þe panne; þanne take it of þe panne, & caste fayre whyte Sugre þer-to, & serue forth; an to euery good meslade take a þowsand Eyroun or mo.
Brawune fryeȝ.
Take Brawune, & kytte it þinne; þan take þe ȝolkys of Eyroun, & sum of þe whyte þer-with; þan take mengyd Flowre, an draw þe Eyroun þorw a straynoure; þen take a gode quantyte of Sugre, Saferoun, & Salt, & caste þer-to, & take a fayre panne with Freyssche gres, & set ouer þe fyre; & whan þe grece is hote, take þe Brawn, an putte in bature, & turne it wyl þer-yn, an þan putte it on þe panne with þe grece, & late frye to-gederys a lytil whyle; þan take it vppe in-to a fayre dyssche, & caste Sugre þer-on, & þan serue forth.
Longe Fretoure.
Take Milke, an make fayre croddes þer-of, in þe maner of a chese al tendyr; þan take owt þe whey as clene as þou may, & putte it on a bolle; þan take ȝolkys of Eyroun & Ale, & menge floure, & cast þer-to, a gode quantyte, & draw it þorw a straynoure in-to a fayre vesselle; þan take a panne with fayre grece, & hete it on þe fyre, but lat it nowt boyle, & þan ley þin creme a-brode; þan take a knyff, & kytte a quantyte þer-of fro þe borde in-to þe panne, & efte a-noþer, & let it frye; & whan it is brownne, take it vppe in-to a fayre dyssche, and caste Sugre y-now þer-on, & serue forth.
Rapeye.
Take dow, & make þer-of a þinne kake; þanne take Fygys & raysonys smal y-grounde, & temper hem with Almaunde Milke; take pouder of Pepir, & of Galyngale, Clowes, & menge to-gederys, & ley on þin kake a-long as bene koddys, & ouer-caste þin kake to-gederys, & dewte on þe eggys, an frye in Oyle, & serue forth.
Ryschewys in lente.
Take Fygys & sethe hem uppe in Ale; þan take whan þey ben tendyr, & bray hem smal on a Mortere; þan take Almaundys, & schrede hem þer-to smal; take Perys, & schrede hem þer-to; take datys, & schrede hem þer-to; & nym Milwel or lenge, þat is wel y-wateryd, & tese þer-to; þan make þin farsure, & rolle a-long in þin hond, & ley hem in flowre; þan make þin bature with ale & Floure, & frye hem vppe brown in Oyle; ryȝt so, make round-lyke Fretourys in þe maner be-for-sayd, & frye hem vppe, & þat ben y-clepid Ragons, & þanne serue hem forth.
Hanoney.
Take an draw þe Whyte & þe ȝolkys of þe Eyroun þorw a straynoure; þan take Oynonys, & schrede hem smal; þan take fayre Boter or grece, & vnneþe kyuer þe panne þer-with, an frye þe Oynonys, & þan caste þe Eyroun in þe panne, & breke þe Eyrouns & þe Oynonys to-gederys; an þan lat hem frye to-gederys a litel whyle; þan take hem vp, an serue forth alle to-broke to-gederys on a fayre dyssche.
Hagas de Almaynne.
Take Fayre Eyroun, þe ȝolke & þe Whyte, & draw hem þorw a straynour; þan take Fayre Percely, & parboyle it in a potte with boyling broþe; þan take þe ȝolkys of Eyroun hard y-sothe, & hew þe ȝolkys & þe Percely smal to-gederys; þan take Sugre, pouder Gyngere, Salt, & caste þer-to; þen take merow, & putte it on a straynourys ende, & lat hange in-to a boyling potte; & parboyle it, & take it vppe, & let it kele, & þan kytte it in smal pecys; þan take þe drawyn Eyroun, & put hem in a panne al a-brode, & vnneþe ony grece in þe panne, & cowche ye ȝolkys & þe Percely þer-on in þe panne, & þan cowche of þe Marow pecys þer-on, & þan fold vppe eche kake by-neþe eche corner in .iiij. square, as platte, and turne it on þe panne oneȝ; let lye a litel whyle; þan take it vp & serue forth.
Cryspeȝ.
Take Whyte of Eyroun, Mylke, & Floure, & a lytel Berme, & bete it to-gederys, & draw it þorw a straynoure, so þat it be renneng, & not to styf, & caste Sugre þer-to, & Salt; þanne take a chafer ful of freysshe grece boyling, & put þin hond in þe Bature, & lat þin bature renne dowun by þin fyngerys in-to þe chafere; & whan it is ronne to-gedere on þe chafere, & is y-now, take & nym a skymer, & take it vp, & lat al þe grece renne owt, & put it on a fayre dyssche, & cast þer-on Sugre y-now, & serue forth.
Ryschewys of Marow.
Take fayre Flowre & raw ȝolkys of Eyroun, & Sugre, & Salt, & pouder of Gyngere, & Safroun, & make fayre cakes; & þan take marow, Sugre, & pouder of Gyngere, & ley it on þin cake, & fold hem to-gederys, & kytte hem in þe maner of Rysschewes, & frye hem in freyssche grece, & þanne serue forth.
Lesynges de chare.
Take fayre Buttys of Porke; hewe hem, & grynd hem, & caste þer-to Raw ȝolkys of Eyroun, & þen putte it in-to a fayre Vesselle; & take Roysonys of corauns, & dates myncyd, & pouder of Gyngere, Pepir, & Safroun, & Sugre, an melle all þes to-gederys; & make fayre past of Sugre & Safroun, & Salt; temper þer-in, & make .ij. fayre flat cakys þer-of, & lay þe stuf þer-on al a-brode on þe cake al flat; & þan take þat oþer cake, & lay hym al a-brode þer-on; & þan kytte the cakys þorw with an knyf in maner of lesyngys; & þan make fayre bature of Raw ȝolkys of Eyroun, Sugre, & Salt, & close þe sydys of þe lesyngȝ þer-with, & þan frye hem in fayre grece, & serue forth.
Fretoure.
Take whete floure, Ale ȝest, Safroun, & Salt, & bete alle to-gederys as þikke as þou schuldyst make oþer bature in fleyssche tyme; & þan take fayre Applys, & kut hem in maner of Fretourys, & wete hem in þe bature vp on downne, & frye hem in fayre Oyle, & caste hem in a dyssche; & caste Sugre þer-on, & serue forth.
Chawettys Fryidde.
Take & make fayre past of flowre & water, Sugre, & Safroun, & Salt; & þan make fayre round cofyns þer-of; & þen fylle þin cofyns with þin stuf, & keuere þin cofyns with þe same past, & frye hem in gode Oyle, & serue forth.
Tansye.
Take fayre Tansye, & grynd in a morter; þanne take Eyroun, þe ȝolkys & þe whyte, & strayne hem þorw a straynoure; & strayne also þe Ius of þe Tansye, & melle to-gederes; & take fayre Freysche grece, & put þer-on ouer þe fyre, tylle it melte; þan caste þe stuf þer-on, & gadere to-gedere with a Sawcer or a dysshe, as þou wolt it, lasse oþer more, & turne it in þe panne; & þan serue it forth.
Froyse out of Lentyn.
Take Eyroun & draw þe ȝolkes & þe whyte þorw a straynoure; þan take fayre Bef or vele, & sethe it tyl it be y-now; þan hew cold oþer hote, & melle to-gederys þe eggys, þe Bef, or vele, & caste þer-to Safroun, & Salt, & pouder of Pepir, & melle it to-gederys; þan take a fayre Frying-panne, & sette it ouer þe fyre, & caste þer-on fayre freysshe grece, & make it hot, & caste þe stuf þer-on, & stere it wel in þe panne tyl it come to-gederys wel; cast on þe panne a dysshe & presse it to-gederys, & turne it onys, & þanne serue it forth.
Ryschewys close & Fryez.
Take Fygys, & grynd hem smal in a mortere with a lytil Oyle, & grynd with hym clowys & Maces; & þan take it vppe in-to a vesselle, & cast þer-to Pynez, Saundrys, & Roysonys of Coraunce, & mencyd Datys, Pouder Pepir, Canel, Salt, Safroun; þan take fyne past of flowre an water, Sugre, Safroun, & Salt, & make fayre cakys þer-of; þan rolle þin stuf in þin hond, & couche it in þe cakys, & kyt it, & folde hym as Ruschewys, & frye hem vppe in Oyle; and serue forth hote.
Nese Bekys.
Take Fygys & grynd hem wel; þan take FreysscheSamoun & goode Freyssche Elys wyl y-sothe, & pyke owt þe bonys, & grynd þe Fyssche with þe Fygis, & do þer-to powder Gyngere, Canelle; & take fayre past of Flowre, & make fayre cakys ryth þinne, & take of þe fars, & lay on þe cake, & close with a-noþer; þen take a Sawcere, & skoure þe sydis, & close þe cake, & Frye hem wyl in Oyle; & ȝif þou wolt haue hym partye, coloure hym with Safroun, Percely, & Sawnderys; & serue forth for a gode fryid mete.
Myleȝ in Rapeye.
Take Fygys & wasche hem clene, and boyle hem in wyne, & grynd hem smal, & draw hem vppe with þe Wyne þat þey were sothyn in; þan take flowre of Rys, & Wyne, & draw þorw a straynoure, & do þer-to pouder Gynger, Canelle, Maceȝ, Quybibeȝ, & þen take Freyssche Samoun, oþer Pike or gode Freyssche Codlyng; seþe it wyl, & pike owt þe bonys; þan take perys y-coryd, & grynde hem ryȝth smal & wyl with þe Fyssche; þan take hard ȝolkys of Eyroun soþin, & grynd it wyth-al, & do it in-to þin veselle, & take with Sugre & pouder Gynger, & meng it with þe farcere wyl, & presse hem to-gederys; þan make a gode bature of Almaunde mylke & Floure, & do þer-in, & frye hem wyl in Oyle, & ley hem yn a dyssche, & pore on þe Sew, & serue forth.
Cruste Rolle.
Take fayre smal Flowre of whete; nym Eyroun & breke þer-to, & coloure þe past with Safroun; rolle it on a borde also þinne as parchement, rounde a-bowte as an oblye; frye hem, & serue forth; and þus may do in lente, but do away þe Eyroun, & nym mylke of Almaundys, & frye hem in Oyle, & þen serue forth.
Chawettys a-forsed.
Take Merybonys & Porke; hew it an Raw ȝolkys of Eyroun, & melle to-gederys with pouder Canelle, Pepir, Gyngere, & Safroun, & Sugre y-now; kyuere hem, frye hem vp in Grece, & serue forth.
Fretoure owt of lente.
Take Flowre, Milke, & Eyroun, & grynd Pepir & Safroun, & make þer-of a bature; pare Applys, & ster hem, & frye hem vppe.
Towres.
Take & make a gode þikke bature of ȝolkys of Eyroun, & marow y-now þer-on, pouder pepir, Maceȝ, clowes, Safroun, Sugre, & Salt; & ȝif þou wolt, a litel soþe Porke or vele y-choppid; þer-to take þen þe whyte of Eyroun, & strayne hem in-to a bolle; þan putte a lytil Saffroun & Salt to þe whyte, & sette a panne with grece ouer þe fyre, & be-war þat þin grece be nowt to hote; þan putte a litel of þe Whyte comade in þe panne, & late flete al a-brode as þou makyst a pancake; þen, whan it is sumwhat styf, ley þin comade of þin Eyroun, þat is to saying, of þe ȝolkys, in þe myddel, & caste by þe cake round a-bowte, & close hym foure-square, & fry hem vp, & serue hem forth for Soperys in Somere.